Unha galaxia imaxinaria

Planetas, xogos e espazos nunha proposta sorprendente que é moito máis ca un parque. Iso é a Galaxia Imaxinaria, un espazo urbano, turístico, cultural, lúdico e pedagóxico localizado no centro urbano de Fene, concello que deu mostra dunha especial sensibilidade cara ao urbanismo. É o resultado dun proxecto de recuperación urbana inspirado en dous eixes centrais: o cultural en diálogo co imaxinario galego, coas lendas, coa literatura etc., e o lúdico e pedagóxico en diálogo coa cultura científica ao redor da Vía Láctea. Para que entendades mellor o espazo, ademais de que o visitedes –non hai coma o contacto directo para entender algo e desfrutalo–, direivos que é unha galaxia con todos estes planetas... O Planeta das Linguas, do Humor, da Area, do Principiño, do Sol, de cando os Animais Falaban, Baixo a Terra, das Herbas Máxicas, do Cabo do Mundo, das Mouras, da Herba de Namorar, das Cidades Asolagadas, do Revés e do Po de estrelas... Todo un camiño cara ao coñecemento a través do xogo.     [É un proxecto de Oxixeno Arquitectura]