Tantas maneiras de chover

Os esquimais non teñen ningunha palabra que signifique "neve", pero contan con máis de 50 vocábulos para denominar os distintos tipos de neve que nós só traducimos como simple "neve". É así porque o idioma, como ferramenta creada polos humanos, adáptase ás nosas necesidades. Por esta mesma razón que os galegos coñecemos ben, na nosa lingua existen máis de 70 palabras diferentes para designar a chuvia, e non por casualidade, non, resulta que somos a primeira fronte de entrada das borrascas chegadas do Atlántico cargadas de humidade que se converten despois en chuvia persistente, intermitente, de carácter débil ou forte... pero non é a miña intención amolarvos tamén a finde con máis cicloxéneses e tormentas perfectas, así que vos traio unha selección de paisaxes soleadas, si, si, con sol, para propiciar a "memoria meteorolóxica" e lembrarvos  que cando menos o pensedes sairá esplendoroso sobre esta marabillosa Galicia, porque "nunca choveu que non escampara".